เอ้ามาเข้าเรื่องกันโลด มาเบิ่งว่าแกงไก่ใส่หน่อไม้ส้ม สูตร เต็มไปด้วยความฮัก มันเป็นจั่งได๋ พุ่นนะ เว้าไปทั่วทีปถั่วแดนเนาะ
มาเบิ่งมาว่าใส่อีหยังแน่ หน่อไม้ส้ม(อีแม่เพิ้นเฮ็ดเอง ดองไว้ฮั่งโดน ฮั่งดี) เนื้อไก่ มื้อนี้ใช้ไก่ ซื้อมาจากตลาด เป็นปีกไก่
ผักอีตู่ ใบบักกรูด ใบผักบั่ว(ต้นหอม) น้ำปลา น้ำตาล น้ำบักขามเปียก น้ำปลาร้า บัดที่นี่มาฮอดพริกแกง มีหัวคิ่งไค้ ข่า กระเทียม พริกแห้ง ผักบั่ว (หอมแดง)
พอเตรียมครบแล้ว กะได้เวลาลงมือเฮ็ด อีแม่ฮ้องมา เฮ็ดแซ่บๆเด้อ บักหล้า
อย่าให้เสียชื่อ แม่ใหญ่นวล พุ่นแล้ว เพิ้นมีชื่อเรื่องเฮ็ดแนวกิน
เพิ้นบอกว่า เห็นบ่ พ่อเมงไปไส่บ่ได้ เพราะว่าแนวกินกรูนี่ล่ะ
ส่วนวิธีเฮ็ดกะเริ่มโลด
หั่นไก่เอาไว้ให้มันพอดีคำ เด็ดผักอีตู่ ฉีกใบบักกรูด หั่นใบผักบั่วเตรียมไว้โลด
แล้วๆกะจั่งมาตำพริกแกง เอาเครื่องพริกแกงทั้งหมดตำให้มันพอละเอียดเนาะ
ตั้งกระทะให้มันฮ้อน บ่ต้องใส่น้ำมันเด้อ เดี๋ยวน้ำมันมันกะสิออกมาเอง
เอาไก่ลงไปคั่วจนใกล้สุก จั่งเอาพริกแกงลงไปผัดให้มันหอม
เอาให้คนหมดบ้านจามสนั่น นั่นล่ะ เป็นอันใช้ได้ แสดงว่าคือสิแซ่บหลาย
แล้วๆกะจั่งเติมน้ำลงไป ท่าให้มันเดือดปุดๆ จั่งเอาหน่อไม้ส้มใส่
ท่าให้มันเดือดอีกเทื่อ หน่อไม้ส้มสิช่อยให้ไก้นุ่มขึ้นเอง
ปรุงรสด้วย น้ำปลา น้ำบักขามเปียก น้ำตาล และกะน้ำปลาร้า
(พระเอกหมอลำเลยเด้) ทิ่มไว้ยังคราว ค่อยใส่ผักอีตู่ กับ ผักบั่ว
สุกแล้วกะยกลงมาโลด ตักใส่ถ้วย เอาไปกินกับข้าวเหนียว แซ่บคัก
จบแล้วขอบักอ้ายไปกินข้าวก่อนเด้อ มีอีหยังกะยกออกมากินโลด
คันมักกะกดซับสะไคร้ข่างล่างโลด
(เหอๆ กล้าเด้อ เว้าภาษาปะกิดนี่ มันแม่นบ่เนาะ)
ขอขอบคุณบทความจาก : https://pantip.com/topic/35500088
